車仔踩行油 狂衝破李城

猪拉多纳

18/03/2012
文： 走肖

做人最緊要開心，踢波都係一樣。車路士今晚喺足總盃8強主場對李斯特城，有權食住上開1.6倍「讓球主勝」。因為車仔安排迪馬堤奧擔任看守領隊後，全隊開心晒，日前歐聯死過翻生晉級，更拉隊落夜店慶祝，加埋費蘭度托利斯要打破「白果24小時」，梗係踩行油破城啦！（now671及672台周日晚10:05直播）

歐聯晉級夜店慶功

保亞斯被炒魷前車仔連諾域治、史雲斯同伯明翰都贏唔到，到底係咪咁削？應該唔係喎，至少迪馬堤奧上任後，佢識得同球員打交道挽救士氣，連贏3場證明爛車都有三斤釘。仲有呀，車仔打沉拿玻里躋身歐聯8強後，全隊去咗昆士柏流浪老細開嘅超級夜店慶祝，邊個找數？睇怕都係開心番嘅超級富豪老闆阿布。


睇番狗仔隊影嘅相，杜奧巴拎住支大雪茄夜蒲，明顯心情勁靚。雖然根據對伯明翰重賽嘅陣容睇，今場杜奧巴未必打正選，但佢後備落場都夠晒殺傷力，更何況費托嘅入球荒時間已突破24小時，難得呢場佢有機會打正選，肯定希望洗脫屈辱，否則跟手對曼城同熱刺，佢咪使旨意打破入球荒。

李城小舒米高把關勁失波

對家李斯特城曾經搵艾歷臣執教，始終搞唔掂，今場焦點可能係昔日曼聯鋼門舒米高個仔卡斯柏舒米高把關，對住車仔鋼門施治。不過講到級數，舒米仔點及得上施治嗰皮，最近佢試過對雷丁、布里斯托城同屈福特單場連失3球，絕對唔算穩陣，隨時益到費托入波，「狐狸」李斯特城要爆冷唔容易。

橫數千軍

 車仔半場多和波


‧近5場4次半場打和、1次領先。

‧看守領隊迪馬堤奧上任後3連勝。

 李斯特城盃賽旺大

‧今季盃賽7戰有5次開入球大。

‧對上14場得1次冇波入。

英格蘭足總盃賽制：

今輪為8強戰，若法定時間內打成平手，均需擇日重賽。重賽若再打和，需加時30分鐘，再和則互射12碼分勝負。