曼聯「客客」劏病狼

猪拉多纳

18/03/2012
文： 麥馬拿仁

今晚英超重頭戲，曼聯作客狼隊。紅魔鬼剛上榜首，贏波就可甩開曼城四分，戰意毋庸置疑，但客W冇肉食、「讓球客勝」又有暗湧，不如轉捧半全場「客客」。曼聯近十五次英超勝仗，九成三開半贏全贏，狼隊主場六連敗曳到極，點會頂得住大勇嘅曼聯？（有線300及200台周日晚9時30分直播）


曼聯剛於歐霸盃出局，球隊再冇任何負擔可專心踢聯賽，加上被畢爾包完勝，紅魔班星級戰將谷到成肚火，遇上病狼唔會留手。睇牌面，今仗係紅魔鬼「屠狼格」，但球隊近五次鬥狼隊，原來僅得一次贏到兩球或以上，今次仲要作客，「讓球客勝」得1.75倍冇分頭博唔過。

狼隊冇咗「掃帚佬」點頂

曼聯最犀利之處就係穩定，佢哋鬥親弱旅都可打出霸氣，一開波就狂風掃落葉，每每半場就可奠定勝基。睇番紅魔近十五場聯賽勝仗，有十四次開半贏全贏，就係呢個打法造就紅魔王朝，如果信曼聯贏波，應讓捧「客客」。


軍情方面，朗尼於作客畢爾包一役受了微傷，但今仗應可披甲，而艾舒利楊格、韋碧克同查維亞靴南迪斯都可候命，攻力肯定有保證。由於曼城周中才有賽事，故此曼聯今仗若贏波，便可將領先優勢增至四分。狼隊被富咸大炒後，上仗主場都不敵布力般流浪，仲開半輸全輸；隊長卡爾亨利繼續缺陣，中場掃蕩力大大減低，極可能一開波就落後，一輸輸到尾。