國體會主場超「強」抵捧

猪拉多纳

13/03/2012
文： 走肖

南美自由盃又有好戲上演，嚟自巴甲嘅國際體育會聽朝喺A組主場對玻利維亞球隊強者，就算「-2」都照撐2倍「讓主」。雖然國體會上年戰績普通，但佢哋近年喺自由盃主場出戰，依然係贏波保證，唔止有92%勝出率，分組賽更幾乎例牌輕鬆贏波，撐得過o架！（開賽時間：周三早上9:00）


國體會係前屆自由盃冠軍，對上兩屆喺自己地頭踢咗11場波，只係試過上屆以1:2不敵彭拿路，其餘10場贏晒，分組賽主場6戰更加全勝，相當巴閉。仲有呀，今屆國體會分組賽首戰主場以2:0解決祖安奧列治，即係近12場自由盃主場得勝率達92%，吼實捧場，收錢機會可能易過排隊買銀行紀念幣。

強者主力射手離隊

作為巴甲名牌球會，現時國體會陣中嘅前鋒祖奧、中場迪阿歷辛度、汀加同左閘基巴都有歐洲外流經驗，射手李安度達美奧上年仲開始入選巴西國家隊添！另一方面，玻利維亞代表強者暫時喺分組賽連贏2場，主要係借助高原主場威力，實情佢哋00年至07年連續7屆自由盃分組賽出局，射手基斯頓雷斯喺自由盃開戰前已離隊，點追得過？


自由盃A組