愛華頓唔怕冇牙老虎

猪拉多纳

13/03/2012
文： 麥馬拿仁

今晚英超爆發默西賽德郡打吡，利物浦主場鬥愛華頓。哀兵紅軍聯賽三連敗，上仗鬥新特蘭表現曳極，球員鬥心、組織俱無，似乎捧走英聯盃後已經滿足。紅軍現時目標轉到英足盃，以目前狀態、戰意，以及聯賽主場僅三成勝率，今仗讓波玩唔過，必捧愛華頓「讓球客勝」！（有線200及300台周三凌晨4時直播）


紅軍本季決心大搞，但演出乏善足陳，目前大幅落後第四阿仙奴10分，聯賽只尚餘11輪，要取得來屆歐聯資格，已屬天方夜譚。利物浦最大問題係心理質素奇差，揀波踢情況非常嚴重，聯賽不敵曼聯及阿仙奴後，球員對歐聯資格似乎打定輸數。

紅軍揀波踢劍指足總盃

利物浦射贏十二碼捧走英聯盃，肯定取得來屆歐霸席位後，紅軍似乎覺得聯賽已經可以放棄。上仗作客新特蘭，球隊表現不知所謂，全場毫無組織，主力如蘇亞雷斯、查理阿當猶如夢遊球場，而丹尼爾艾格受傷缺陣下，新秀中堅高亞迪斯演出慌失失，紅軍前後都唔掂，輸波非常合理。


達寧、查理阿當等新球員演出於水準之下，最明顯係佐敦軒達臣，可以開波打右中場、換邊後打中場中，連領隊杜格利殊都唔知自己想點。雖然杜帥死撐仍可殺入前四，但查實已淪為口號，既已穩奪歐霸席位，相信球隊勢必爭做「盃賽雙冠王」，嚟緊周一凌晨紅軍將於英足盃迎擊史篤城，所以今場未必去盡。


好多人話紅軍飄忽，衰極後就會反彈，但球隊本季主場戰績曳有目共睹，十三場聯賽僅贏四場，對住史雲斯、諾域治、布力般都贏唔到。相反，愛華頓近況一流，已經九戰不敗，當中包括擊敗曼城、車路士同熱刺，演出火氣十足，見到死敵得半條人命，必打冇牙老虎。


另外值得一提嘅係，三月十四日係「拖肥糖」領隊莫耶斯執教十周年正日，眾將戰意必有所提升，作客贏埋都唔奇。