槍手獵喜鵲炮製「大」鑊飯

猪拉多纳

12/03/2012
文： 走肖

隨住聯賽盃、足總盃同歐聯先後玩完，現時阿仙奴唯一目標，就係攞番個聯賽第3名做安慰獎，領隊雲格同隊長尹佩斯更加講到明，要喺排名上騎住倫敦死對頭熱刺補鑊。阿仙奴今晚喺英超主場對「喜鵲」 紐卡素，槍手上番滿子彈要捧1.54倍入球大！（有線200、300及廣東體育周二凌晨4:00直播）


現時兵工廠落後熱刺4分，不過打少1場，由於連續7年冇冠軍攞已成定局，教頭雲格話至少要攞到聯賽第3名，因為佢覺得英超以外嘅其他球隊，近年唔再好蝦，曼聯同曼城喺歐霸盃連環冧檔可以證實呢點。為咗確保下屆直入分組賽，雲格話點都要攞到聯賽第3名，順便騎住熱刺做番倫敦No.1球會。

紐卡素「黑雙煞」唔嘢小

同時間，今季連盃賽上陣37場，交出32個入球、11次助攻嘅阿仙奴隊長尹佩斯都話，「強烈感覺」兵工廠會以第3名過終點。咁又係，最近「傷兵工廠」開始轉運，唔少傷兵相繼復出，好似呢場又有中場阿迪達、艾朗藍斯同左閘安德里山度士可以候命，近排3連勝喪入10球唔憂冇波入，信心當然大過天。


對家方面，紐卡素都要為下屆歐洲賽席位而戰，佢哋對塞內加爾「黑雙煞」前鋒拍檔丹巴巴亞同柏比斯施斯，更加連雲格都豎起手指公大讚，承認有興趣拉攏佢哋「入廠」。有機會踢阿仙奴，相信呢句說話對丹巴巴亞同柏比斯施斯嘅鼓勵作用，比起紐卡素領隊柏杜講3個鐘頭仲有用，呢場對攻格玩入球大最穩陣。

橫數千軍

阿仙奴主場對賽火力猛


‧近4次主場對紐卡素有3次攻入3球。

‧對上7場有6次開入球大。

紐卡素近戰作客輸咗8成

‧最近5場作客得1勝4負，輸波率達80%。

‧近7場得1次保持清白。