曼聯朗尼弗爆 誓搵西布朗祭旗

猪拉多纳

11/03/2012
文： 查理阿蛋

曼聯於上周中歐霸盃喺奧脫福出擊，竟慘遭畢爾包蹂躪，難免令人覺得英超已經比唔上西甲，不過「紅魔鬼」上仗無出夫添，而且佢哋一返聯賽就醒神，除咗傷兵陸續復出，仲有弗到漏油嘅朗尼壓陣，今仗對住實力爭幾皮嘅西布朗有力大勝，一吐周中烏氣，小妹熱捧1.68倍「讓球主勝」！（有線200及300、廣東體育周日晚10:00直播）

吸取教訓唔敢再輕敵

強如曼聯，喺今季歐洲賽仍頻頻慘遭滑鐵盧，證明英超球隊實力已今非昔比，未必再係歐洲最頂尖嘅一群。但單論英超，小妹仍然相信以「紅魔鬼」嘅質素，夠晒喺本土聯賽蝦蝦霸霸，成功衞冕冠軍！事實上，領隊費格遜上仗畀幾位主將休息，明顯係想留番今晚搏殺，喺剩低嘅賽程全力搶分，希望可以反超曼城奪冠。


經過上仗輸畀畢爾包嘅教訓，費Sir又點敢再輕敵？佢今仗大有機會用番史高斯同卡域克打正選，增強中場控制力，抖夠嘅拿尼同艾舒利楊格亦可以利用速度喺邊線突破，只要掌握好比賽節奏，要炒番西布朗2、3球絕對唔難。


不過最重要嘅係朗尼近3仗攻入4球，狀態勁弗，而且佢最鍾意恰西布朗，過去4次對賽怒轟3粒，西布朗今次好有可能再衰喺「魔童」手上！

西布朗列特提早收咧

係，西布朗近期表現唔錯，射手奧丹維治仲踢到着晒火添，不過領隊鶴臣逢作客波就採用保守戰術，今仗未必夠膽同「紅魔鬼」鬥攻，除咗話嘥晒奧丹維治，仲隨時會畀曼聯撳住嚟砌。睇埋西布朗今季作客熱刺、阿仙奴及車路士等前列球隊均輸波而回，後防大將史提芬列特又提早收咧，今次造訪奧脫福，輸少幾球已經要還神喇。

曼聯對賽11戰9勝

‧近7場聯賽攻入17球。

‧曼聯喺聯賽近11次鬥西布朗錄9勝2和。

西布朗最怕朗尼

‧近4次對曼聯遭朗尼攻入3球。

‧近期錄得自2002年以嚟首次3連勝。