熱拿亞欺負老婦人

猪拉多纳

11/03/2012
文： 巨高

周日意甲早場為熱拿亞主場對祖雲達斯，「老婦人」祖記係今季爭標主角之一，搶分鬥志唔使懷疑。但衰在球員狀態回落，近三場聯賽全部打和。祖雲達斯欠銳氣，作客讓波自然唔睇好。熱拿亞實力比祖記確係差少少，但勝在有主場之利兼有強手復出，受讓可捧「讓球主勝」。


（now 633及660周日晚10時直播）


熱拿亞近期成績回落，與前鋒基拿甸奴缺陣有關，呢位前國腳今場傷愈復出，相信對球隊攻力必有極大幫助。其實熱拿亞一向缺乏高質射手，前場單靠一個柏拉斯奧好難威脅到對手。既然今次熱拿亞可以雙箭頭攻堅，成個形勢就唔同晒。


大家都知距離歐洲國家盃揭幕唔夠一百日，基拿甸奴一定要喺未來日子盡騷哥利，以入球討好師傅兼意大利領隊柏蘭迪利。巨高絕唔會懷疑基拿甸奴嘅質素，今場對住祖雲達斯係佢表現自己嘅大好良機。

祖雲達斯鬧中堅荒

祖雲達斯今場都幾麻煩，一對正選中堅基亞連尼及巴沙利都唔出得，而邦路斯又停賽。故此教練干地要將右閘馬田卡沙利斯移入，與中場維達爾合作扼守中路。兩個都唔係正宗守衞，默契及截擊力都有疑點。


提到教練干地，因為佢上輪聯賽領紅牌，今晚只能坐喺觀眾席睇波，冇佢喺場邊喝住班波，或多或少對球隊演出有影響。「斑馬」陣殘、客場兼態沉，今場根本讓唔起熱拿亞，1.85倍「讓球主勝」咪錯過。