皇馬再煲魚生粥

猪拉多纳

10/03/2012
文： 山度士

今晚西甲尾場，貝迪斯於主場布陣鬥皇家馬德里。貝迪斯係一支好蝦人估嘅球隊，表現非常飄忽。皇馬下周中有歐聯後顧，或會有所保留，未必搏盡，預計小勝居多。（now 632周日清晨5時直播）

如果球迷有玩開西甲，都知有幾隊波「鬼鬼哋」，其中一隊係貝迪斯。今季升班嘅貝迪斯，開季四連勝表現係威係勢，點知之後十場聯賽輸九場，對手仲包括桑坦德、基達菲、華歷簡奴之流，更可憐係只入得四球咁大把。

當大家睇死佢哋之際，貝軍曾有過一陣「小陽春」，戰勝過馬德里體育會、畢爾包、華倫西亞，仲係今季聯賽首支打破巴塞隆拿於魯營不失球金身嘅球隊，但跟住又輸番幾場，真係估佢唔到。


留力下周中歐聯


面對呢類專打老虎嘅蠱惑波，皇馬唔能夠大意，況且今場係作客。唔好睇皇馬頻頻大勝，其實大多數係主場，佢哋近六場作客雖有四勝，但都係小勝一粒，上仗作客華歷簡奴，竟然全場被主隊圍攻，如果唔係C朗拿度福至心靈嘅後腳入波，相信已失分而回。

另外，皇馬下周中要應付歐聯十六強次回合，佢哋首回合作客同中央陸軍打和，雖然有一個作客入球，但不能大意，教練莫連奴今仗或會留力。當然以貝迪斯嘅實力未必贏到皇馬，度士預計皇馬領先就收油，保住小勝局面到尾。

山度士

前香港足球先生，畀料同佢做人一樣，百足咁多爪，對唔同聯賽都有興趣。教波同貼波，一樣做阿哥