史特加着火主場奏「凱」

猪拉多纳

09/03/2012
文： 蘇斯黑柴

德甲獨腳戲史特加主場鬥凱沙羅頓，計實力同近況都強弱懸殊，史特加有前冇後踢法過去予人感覺唔夠穩定，但今仗面對反擊能力極曳嘅凱沙根本唔使擔心，以史特加着晒火嘅鋒線，今仗有力大炒對手，黑柴推介2.5倍「讓球主勝」。（有線61及201台周六凌晨3時30分直播）




史特加少帥拉巴迪亞崇尚進攻，佢哋本身鋒線已經有人滿之患，歇冬後更招攬埋賀芬咸嘅波斯尼亞中鋒伊比斯域來投，結果成功擦出火花，球隊近4場聯賽贏3場，合共轟入15球，伊比斯域呢4場波共入兩球並交出4次助攻，佢憑住積極跑動同突破能力，帶動球隊整條鋒線，令夏歷同岡崎慎司都如魚得水。


凱沙羅頓反擊乏力


凱沙羅頓啱啱相反，反擊力極度疲弱，歇冬後7戰未贏過，近5場只得1分而且僅入1球，已跌至聯賽榜包尾，教練古斯到今時今日仲不停變陣，但效果欠奉，全隊目前都處於悲觀情緒，作客面對着晒火嘅史特加等炒。