巴塞開火再o趙利華

猪拉多纳

07/03/2012
文： 朱楓

美斯復出啦！呢位日前喺西甲停賽嘅射手，今晚會喺歐聯16強次回合主場對利華古遜回歸，養精蓄銳下隨時大開殺戒，加上巴塞喺魯營一向恰慣德國球隊，對住喺歐聯有「作客病」嘅利華，朱楓非常睇好巴塞可以輕鬆贏多鋪，就算讓2球都夠本錢開1.88倍「讓球主勝」！（有線61、64、201及204、中央5台周四凌晨3:45直播）


近9次主場對德軍全勝


首回合巴塞作客利華古遜，即使一度被追成1:1，但之後一禁掣就連入2球輕鬆贏3:1。雖然該場梅開二度嘅阿歷斯山齊士日前對希杭時整傷腳，證實要抖兩個禮拜，今晚聯同後衞艾比度一齊缺陣。




好彩巴塞今場有王牌復出！上場對希杭停賽嘅射手美斯，今晚會重返正選孭飛。呢位射手近排弗到爆，近4場代表球會同國家隊比賽足足入咗9球，難得啱啱獲得回氣機會，呢場對利華隨時又爆發，再睇埋巴塞近9次主場對德國球隊獲得全勝，入24球僅失4球，好明顯恰死德國球隊。


利華歐聯作客曳


雖然首回合落後1:3，今晚至少要贏2球或以上先有機出線，但利華古遜教頭杜特賽前都唔肯認輸，話巴塞唔係無敵之師。係，利華近況的確幾好，日前主場贏拜仁2:0後，錄得今季首個3連勝，前鋒舒賀爾尼同戴迪約克亦成功克服傷患復出，今晚好大機會連同右閘哥魯卡一齊擔正，不過德甲始終唔同歐洲賽，睇番往績，原來利華自02年10月後，之後喺歐聯12場作客賽事都未贏過，得3和9負，正宗門口狗，今晚去到魯營，睇怕都係九死一生。




首回合：巴客勝3:1


橫數千軍


巴塞主場49戰不敗

近49場主場不敗獲42勝7和。

近6次交手獲4勝2負，對上4戰全勝。

利華歐聯失波多

分組賽至今失11球，為歐聯16強中最多。

近27場僅7場保持清白。

賽果熱線：2707 9900　周三晚8時20分起至周四晚6時止