全北汽車畀油砌廣州

猪拉多纳

07/03/2012
文： 法達斯維

今日早場亞冠盃H組賽事，「中超皇馬」FC廣州（廣州恒大）登場，作客韓職全北汽車。眾所周知，FC廣州今屆劍指亞冠，希望擺脫中超球隊以往的頹勢，不過，全北汽車絕非善類，馬會開出FC廣州受讓半一咁筍，擺明睇死佢哋，要全北主W。（now 671周三晚6時直播）


FC廣州傷兵滿營


雖然全北現由李興實擔任看守教練，但佢冇改變該隊一貫主攻打法，剛喺韓職揭幕戰旗開得勝，「獅子王」李東國更梅開二度，有呢位韓職史上入球王壓陣，唔使擔心冇波入。相反，FC廣州嘅鄭智、趙旭日、馮瀟霆上周代表中國隊出戰受傷而回，或會影響陣上演出。




講真，FC廣州受讓半一，其實幾吸引，但換個角度睇，馬會咁開一定有玄機。首先，呢組除FC廣州同全北汽車外，仲有日職盟主柏雷素爾，名副其實係死亡之組，若要爭取出線，每場都須盡力求勝。與上屆亞軍全北相比，FC廣州缺乏亞冠經驗，加上中超球隊嘅「恐韓症」未愈，作客未必能全身而退，簡單要個主W。


賽制


現為分組賽階段，32隊分8組，每組4隊，採雙循環制，每組首名及次名晉級，A至D組為西亞球隊，E至H組為東亞及東南亞球隊。分組賽出現同分，將順序以下列方法定名次：1.有關隊伍對賽得分　2.有關隊伍對賽總球差　3.有關隊伍對賽總入球數　4.分組賽中總球差　5.分組賽中總入球數　6.若相關球隊是兩隊而又情況許可，兩隊互射12碼決勝　7.分組賽中較少紅黃牌數目　8.抽籤