洛賓弗爆！拜仁「遜」得過

猪拉多纳

03/03/2012
文： 朱楓

今晚德甲有場前列大戰，由「二哥」拜仁慕尼黑作客第5位嘅利華古遜。兩隊賽前都受傷兵困擾，不過拜仁勝在仲有大勇嘅洛賓孭飛，加上「小豬」舒韋恩史迪加又已復操，對住有歐聯後顧之憂嘅利華，朱楓會捧1.65倍客W！（有線61周六晚10:30直播）




拜仁今季真係好乞人憎，對住弱旅唔係小勝就失分，但一對勁旅就重現霸氣，好似上周主場就輕取史浩克04。雖然啱啱過咗國際賽後，中場列貝利、湯馬士梅拿、後衞謝路美保定、畢斯杜巴同拿姆都話整傷咗，今晚隨時倦勤，不過喺對英格蘭一役梅開二度嘅洛賓就肯定可以披甲，而且舒韋恩史迪加復咗操，陣容仍然靠得住，唔好唔記得教練軒歷基斯仲會倒戈，試問點衰得？


利華古遜殘陣輸戰意


至於佔地利嘅利華古遜雖近況回勇，上場作客贏科隆後更取得兩連勝，不過踢完太公波後，前鋒舒賀爾尼、戴迪約克同右閘哥魯卡加入埋十字軍之列，中場波歷克、悉尼森姆同巴尼達又仲未好番，幾日後又話要喺歐聯16強次回合作客硬撼巴塞隆拿爭出線，殘陣兼話唔定會留力踢歐聯，戰意成疑，今晚破到蛋都偷笑啦！