阿仙奴反彈爆破紅軍

猪拉多纳

03/03/2012
文： 阿占

今晚利物浦主場迎戰阿仙奴，名副其實係英超「四哥」爭奪關鍵戰！紅軍上星期符碌捧聯賽盃，表現令人失望；相反，阿仙奴就喺倫敦打吡反勝熱刺5:2，無論決心同狀態，都反映佢哋已走出低谷，「兵工廠」受讓平半，捧2.18倍下盤。（有線200、204（3D版本）、300及廣東體育周六晚8:45直播）




阿仙奴上場絕地反勝熱刺，唔單止重返第四位，呢場漂亮勝仗，亦大大提升班兵仔嘅信心同士氣！係，「槍手」之前喺聯賽遇強必敗，先後喺季初畀曼聯大炒，面對紅軍、熱刺、曼城亦全數敗陣，不過經過一輪調整，呢隊阿仙奴已經唔同晒，接連喺英超炒起布力般同熱刺，錄得久違了嘅英超3連勝，完全係呢班波谷底反彈嘅寫照！


廠仔唯一目標保前4


其實咁都唔意外吖，始終阿仙奴陣中年輕球員較多，只要踢得順，有番信心，表現同成績自然會返晒嚟。最令阿占放心嘅，係一對土炮快翼阿歷士張伯倫同禾確特家陣信心爆棚，有佢哋造波畀「大佬」尹佩斯，配合控制比賽能力同經驗都係一流嘅路斯基同阿迪達，「兵工廠」嘅鋒力相當靠得住。咪忘記阿仙奴喺歐聯輸咗9成，足總盃又出埋局，確保英超前4係佢哋家陣嘅唯一目標，論戰意實力，「廠仔」都唔會差得過「紅軍」囉！


利物浦中堅艾格打柴


相反，利物浦上星期歷盡驚濤駭浪捧走聯賽盃，但論嗰場波嘅表現，真係可以用「不堪入目」嚟形容，睇埋佢哋近9場聯賽嘅戰績，竟然係得2勝4和3負！點信得過呀？而且呢班衰波唔知有心定無意，專喺盃賽先嚟發威，家陣佢哋前面仲有個足總盃，爭勝決心點都唔及阿仙奴，中堅丹尼爾艾格又話打埋柴，防線不穩學人讓波？唔反點得呀？