凱沙救亡大搏殺

猪拉多纳

03/03/2012
文： SAMYO肥叔

德甲下游形勢都幾緊湊，尾二球隊凱沙羅頓分數仲未突破二十大關，急需搶分救亡，今次主場對禾夫斯堡係個好機會，但呢班波始終冇乜贏波本錢，讓波唔多信得過，考慮到兩隊防守都曳，捧入球大最好！




（周六晚10時30分開賽）




凱沙羅頓實力有限，今季目標好簡單，首要任務係保住頂級聯賽席位，不過，佢哋歇冬後戰績未有起色，近期接連輸波，形勢愈來愈差，今次仲要讓波，真係唔多信得過。禾夫斯堡係正宗神經刀，客場表現算係最穩定，穩定地差啊！呢班波後防好曳，今次搶唔搶到分好難講，但預計會同對手合演入球騷，一於要大盤啦！


史篤城主場夠殺


同日英超賽事史篤城主場對諾域治，捧主隊！史篤城本身人腳同實力都唔錯，今季聯賽戰績下滑，主要因為要兼顧歐洲賽，隨住球隊於歐霸盃畢業，可以專心打聯賽。史篤城主場評級甚高，經歷之前一輪劣績後，預期嚟緊可以逐步改善戰績，對住同級球隊諾域治夠殺，一於捧主隊！




（有線204及304台周六晚11時直播）




跟住同大家傾吓波，印尼剛於世盃外圍賽對巴林輸十粒，引起國際足協關注，老老實實，印尼波向來多麻煩嘢，呢類球隊本身冇乜誠信可言，肥叔幾時都話一日有數以百場波玩，冇必要踩入呢啲陷阱，以後大家當睇少隊啦！