阿仙奴狼惡過豬

猪拉多纳

03/03/2012
文： 蘇豪

英超周末重頭戲由利物浦主場迎擊阿仙奴。紅軍今季聯賽主場不敗，但勝率不足三成四，球隊上周於英聯盃決賽醜陋地射贏十二碼捧盃，今次對手由英冠球隊卡迪夫城變成兵工廠，贏波阻力極大，讓波難靠，捧阿仙奴「讓球客勝」！（有線200及300台周六晚8時45分直播）


反勝熱刺生晒


利物浦剛奪取英聯盃結束六年錦標荒，粉絲理應歡天喜地開香檳慶祝，不過，蘇豪留意到有利迷於網上痛斥愛隊贏得難睇，紅軍戰至加時領先後縮後諗住頂到完場，踢法相當消極，結果被逼和，最終射贏十二碼慘勝收場！當然，踢波冇話要場場贏得漂亮，但對住隊英冠球隊都咁怕輸，確實好醜怪，今仗賽前消息指主將謝拉特及格連莊臣有傷上陣成疑，更難予人信心！




另一邊廂阿仙奴上周於北倫敦打吡戰反勝熱刺五比二，全軍球員信心指數飆升。兵工廠今季有啲神經質，對住曼聯輸過二比八，但佢哋癲起上嚟唔係人咁品，上次熱刺慘成受害者，車路士亦曾於主場輸畀阿仙奴三比五。依家兵工廠唔單止尹佩斯識入波，連禾確特同路斯基等人都弗番，前面惡到暈，即使防線有梅迪薩卡缺陣，影響亦唔大。


紅軍往績輸蝕


跟住睇埋數據，利物浦今季於主場撞邪，聯賽主場十二戰只贏四場，勝出率低至33 %，加上球隊近年畀阿仙奴剋住，對上八次交手只贏一場，正正係趁季初兵工廠兵荒馬亂之時贏波。今場勝負關乎前四爭奪歐聯入場券命運，蘇豪決投阿仙奴信心一票。




再睇埋兩軍射手，阿仙奴隊長尹佩斯今季入球停不了，可謂如狼似虎，反觀紅軍射手蘇亞雷斯畀艾拉激一激，搞到停賽多場，之後仲唔肯同艾拉握手，令到滿城風雨，以致狀態大跌，上場英聯盃決賽踢到冇影，可謂豬咁蠢，今晚兩人相遇，仲唔係豬狼對決？