阿德留力亞冠盃 珀斯夫添攞着數

猪拉多纳

01/03/2012
文： Mic少

今日下午澳職獨腳戲，阿德萊德聯主場對珀斯光輝，阿軍近九場聯賽僅一勝，打入季後賽機會已非常渺茫，球隊隨時放棄聯賽，集中火力踢好亞冠盃，今仗戰意成疑。珀斯光輝近期作客Sharp醒，而且射手史美斯及中場大將米拿可望復出，更添勝算，受讓平半之下，Mic少捧下盤。




（有線64及204台周四下午5時直播）




澳職常規賽只剩下四輪比賽，頭六位球隊可以進身季後賽，阿德萊德聯現時落後第六位紐卡素噴射機八分，以佢哋今季長期低迷表現，要打入季後賽幾乎係冇可能。由於澳職並冇降班制度，換言之餘下比賽對阿德萊德聯而言，基本上已成例行公事，鬥心肯定無幾。




以目前形勢，阿德萊德聯應該會將重心放喺亞冠盃分組賽，佢哋將於下周中作客烏茲別克勁旅賓約高，更加可能喺今場意義不大嘅聯賽留力，再次失分嘅機會高唱入雲。


主力復出爭踢季後賽


珀斯光輝排聯賽第四位，季後賽席位未穩，球隊上仗吞強隊獅吼三蛋，主因係首席射手史美斯及中場主力米拿缺陣，不過兩人今仗可望復出，光輝又可以強陣出擊。另外，光輝近五場作客取得三勝一和一負，演出不俗，今場受讓平半更具捧場價值。