太極虎狂噬科威特

猪拉多纳

29/02/2012
文： 走肖

南韓今晚喺世盃外主場對科威特，和波已足夠肯定躋身亞洲區第4圈賽事，即係所謂10強賽，雖然早前南韓炒咗教練趙廣來，不過喺新帥崔康熙帶領下，日前响熱身賽以4:2打沉烏茲別克，佢嘅全北汽車愛將李東國更加梅開二度信心返晒嚟，信得過「康熙盛世」要捧「讓球主勝」！（開賽時間：周三晚8:00）




雖然南韓喺B組以3勝1和1負暫列榜首，但由於達唔到球迷期望，教練趙廣來始終冇得留低。新教練崔康熙上季帶領全北汽車奪得韓職總冠軍，上任後即刻將阿仙奴前鋒朴主永打入冷宮，安排蔚山現代中堅郭泰輝代替佢做隊長。結果南韓日前對烏茲別克大勝4:2，證明改朝換代成功，「獅子王」李東國更加連𡁻2球威到爆。


朴主永打入冷宮都夠殺


雖然今次南韓有奧格斯堡中場具滋哲停賽，新特蘭前鋒池東沅、保頓翼鋒李青龍同些路迪後衞車斗里冇入選，但既然崔康熙夠膽要外圍賽攻入6球嘅朴主永坐冷板，仲要用李東國踢單箭頭，踢個4-2-3-1陣式，原因係始終有些路迪中場寄誠庸同艾薩德中堅李正秀撐場，對住得個海灣盃神射手艾穆華孭飛，兼且有後衞法赫爾停賽嘅科威特，主場應該唔會甩拖，何況近4次對賽，科威特得1和3負，邊似惡得出樣？