荷蘭平手獵英

猪拉多纳

29/02/2012
文： 麥馬拿仁

適逢歐國盃決賽周開幕倒數100日，周四凌晨有多場國際熱身賽助興，重頭戲係英格蘭於溫布萊迎戰荷蘭。前領隊卡比路請辭，令「三獅兵團」軍心不穩；加上朗尼及戴倫賓特因傷缺陣，英軍充斥不利因素。荷蘭「神鋒」尹佩斯弗到震，平手盤捧客軍。（now 671及672周四凌晨4時直播）




英格蘭名氣大，而且主場有威力，但今次迎戰荷蘭莊家開出平手盤，「讓球主客和」更受讓一球，可知正受內外壓力嘅「三獅兵團」被專業人士睇淡。卡比路領軍四年後突然離開，對球隊士氣必有負面影響；現由Ｕ21領隊皮雅斯暫時掌舵，無論點兵、臨場調配及備戰各方面，卡士、能力均有不及，英軍就算有主場之利，發揮都必定打折扣。


戴倫賓特緣盡歐國盃


另外，英格蘭今戰有多名主力缺陣，而且試陣味濃，前隊長泰利、前鋒朗尼及戴倫賓特受傷退選（戴倫賓特長抖三個月，歐國盃唔使預佢），尼史葛、菲臘積基爾卡、林柏特、迪科爾落選，「三獅兵團」前線將搵史杜列治同韋碧克攻堅，而後防就以菲爾鍾斯、加利卡希爾等擔大旗，似Ｕ21國家隊多過一隊，今仗雖有剛當選2011年國家隊最佳球員嘅柏加在陣，亦難贏荷蘭。




上屆世界盃亞軍荷蘭，雖有雲達華治落選，中場大腦史奈達近期又狀態麻麻，但陣中仍有洛賓、尼祖迪莊、古積特、亨特拉爾等壓陣，而且前鋒尹佩斯弗到爆燈，球隊無論實力、經驗都凌駕主隊。尹佩斯自去年起入波如食生菜，上仗英超鬥熱刺又入波又助攻，最重要係佢熟悉英軍踢法，今場又有可能如入無人之境成功數胡。


英軍「新帥」焗試陣


皮雅斯屬傳統英式領隊，預料英軍今仗會用４４２陣式，而佢執教鞭只係暫時性質，鬥荷蘭會抱不求有功但求無過心態應戰，以主隊攻力難對「橙軍」構成威脅；而荷蘭整體及人腳較好，平手盤坐和望贏，亦可考慮細盤。