比拿美睇「猩猩」心理書收晒火

猪拉多纳

26/02/2012


遭曼城遺棄嘅比拿美，今季返回利物浦後迎來第二春，技術同狀態兼備之餘，連為人詬病嘅臭脾氣都大有改善！呢位威爾斯前鋒就大爆自己全憑一位資深心理學家嘅著作，先成功重獲新生！




決賽入波兼捧盃3倍




以前嘅比拿美場內場外都惡行連連，佢上次効力利物浦時，就曾為小事用高爾夫球棍毆打當時嘅隊友懷斯，不過今次重投紅軍，唔止入波多咗，就連牌都食少咗！比拿美話因為佢睇咗心理學家Steve Peters嘅著作《猩猩的矛盾》，呢本書旨在教人理性思考，唔好畀好似猩猩咁嘅原始本能控制行為：「其實我體內隻猩猩成日蠢蠢欲動㗎，不過控制得好咗好多。」




比拿美今季表現可人，菠菜公司William Hill就開出3倍賠率，睇好比拿美入波兼利物浦捧盃。但係對手卡迪夫城唔止係比拿美舊東家，更係佢出生城市嘅球會，自細支持「藍鳥」嘅比拿美就話：「自私啲講，如果利物浦可以小勝同埋唔係我入致勝球，就最完美喇！」