日本練兵主戰冰島歎細界

猪拉多纳

24/02/2012
文： 蘇豪

亞洲勁旅日本今晚主場約戰歐洲弱旅冰島拍跳，賽事並非喺國際賽檔期舉行，日軍未能召入海外兵團，入選球員清一色喺國內搵食，包括多位新丁，京都不死鳥嘅高校生久保裕也首度入選成焦點，大軍試陣味濃，加上日職未開咧缺態，熱W唔抵玩，冰島鋒力一般，捧細！（周五晚6時20分開賽）


高校生久保裕也矚目入選


日本下周喺世盃外對烏茲別克，近期積極備戰，但海外兵團未歸隊，主帥沙哲朗尼今戰主要想試陣，九十後小將久保裕也、柴崎岳及磯村亮太等人首度入選，京都不死鳥前鋒久保裕也年僅十八歲，前途一片光明，鹿島鹿角中場柴崎岳亦被寄予厚望，多位矚目新星勢成今場焦點。




日本仍有不少沙場老將在陣，包括中場遠藤保仁及中村憲剛，射手前田遼一及大久保嘉人等，名古屋鯨魚左腳王藤本淳吾獲分配十號波衫，近期積極加操練罰球，希望討好主帥沙哲朗尼。另外，守將槙野智章及伊野波雅彥挑戰歐洲失敗，回國後獲國家隊重召，同樣想獲得重用。




冰島近年足球發展停滯不前，世界排名跌出一百位，今次老牌球星古莊臣、英超兵希古臣及史甸臣都冇入選，阿積士射手史基賀臣被視為國家隊前線新希望，但今次受傷缺陣，球隊中前場球員質素平庸，威脅力有限。日本贏面高，但日職未開咧球員冇態，欠大勝本錢，捧細最好！