彭拿路卡士贏晒國民

猪拉多纳

21/02/2012
文： ComboKing

今晚除咗有歐聯之外，明早仲有「南美歐聯」之稱嘅南美自由盃，Ｈ組烏拉圭勁旅彭拿路主場對哥倫比亞球隊國民體育會。上屆亞軍彭拿路首仗以寡敵眾搞到輸波，今輪返到自己地頭，肯定會打醒十二分精神，以佢哋嘅優質人腳及豐富經驗，應可及時回勇，捧主勝。（周三早上６時15分開賽）




彭拿路曾經五次奪得自由盃冠軍，僅次於兩支阿根廷球隊獨立隊及小保加，上屆亦打入決賽，但輸畀山度士，功虧一簣，所以球隊好想今屆可以捧盃彌補遺憾。彭拿路上輪作客○比一不敵葛度爾古斯，主因係有近半場時間打少一人，輸波情有可原。




彭拿路陣中不乏猛將，包括曾經効力祖雲達斯、西維爾及拿玻里等歐洲球隊嘅前鋒薩拉耶達，只要彭拿路發揮正常水準，要贏國民體育會，並唔困難。國民體育會過去十屆自由盃，只曾出席兩屆，上輪靠主場贏波後，提防今場回氣。


Ｄ組薩莫拿好守「細」


Ｄ組沙蘭迪兵工廠主場對ＦＣ薩莫拿，委內瑞拉球隊ＦＣ薩莫拿上輪爆冷守和阿根廷勁旅小保加○比○，今次再鬥另一支阿根廷球隊沙蘭迪兵工廠，隨時再施「守」術，捧入球細。Ｆ組另一支委內瑞拉球隊塔奇拉作客墨西哥球隊藍十字，兩軍都係守強攻弱，同樣要細盤。