陸軍皇馬合演 星球大戰

猪拉多纳

21/02/2012
文： Wendy

今個周中上演另外四場歐聯十六強首回合賽事，周三凌晨早場有莫斯科中央陸軍主場迎戰皇家馬德里。呢場對「銀河艦隊」嚟講絕對係個考驗，事關佢哋要去到莫斯科盧茲尼基球場，要喺零下十二度比賽，寧願揀入球大！（有線61、64、201及204台周三凌晨1時直播）


銀河艦隊「托弗」


上周末皇馬不費吹灰之力四球輕取桑坦德，呢場波基斯坦奴朗拿度、賓施馬同沙比阿朗素等主力都有上陣，加上傷愈復出嘅迪馬利亞亦射入一球世界波，成班球員狀態大勇。依家皇馬喺西甲仍然拋離死敵巴塞隆拿十分，爭標形勢大好。佢哋踢完上仗聯賽後，已立即起程去莫斯科，務求盡早適應天氣。




中央陸軍方面，佢哋喺最後一輪分組賽驚濤駭浪之下，作客擊敗國際米蘭，先至成功壓過特拉布宗躋身16強。由於俄超歇冬仲未重開，球隊只能靠踢熱身賽維持狀態。佢哋兩季前曾經打入歐聯八強，當年正正係畀莫連奴帶領嘅國際米蘭淘汰。


16強首回合旺大


睇番上周四場十六強比賽，當中有三場開入球大，反映現時各隊踢淘汰賽已冇前幾年咁保守，個個都希望盡早有入球，控制形勢。皇馬同中央陸軍喺分組賽六場波，各有四場係開出入球大；皇馬進攻火力唔使多介紹，主隊中央陸軍嘅蘇蘭托錫等攻擊球員亦有一定質素，佢哋有力撕破皇馬唔係好穩陣嘅防線，所以小妹推介呢場波入球大！