黑貓變老虎狂噬殘兵！

猪拉多纳

18/02/2012
文： 走肖

新特蘭今晚喺足總盃16強主場再遇阿仙奴，受讓平半有計，事關「黑貓」喺奧尼爾領軍後惡過老虎，而且兵工廠唔單止有亨利借用期滿，仲有消息話巴塞同皇馬已經決定硬撬尹佩斯，雲格亦打定輸數會放人，家陣班小兵嘅士氣可以話直插谷底，要讓平半？揀「黑貓」1.86倍下盤好過啦！（now671、672台及廣東體育周日凌晨1:15直播）




阿仙奴淨吞AC米蘭4蛋，係佢哋近56年嚟歐洲賽最大敗仗。由於歐洲賽歷史上，從未有球隊喺淘汰賽階段首回合落後0:4，能夠喺次回合翻身，所以雲格已下令要踢好足總盃，避免連續7年冇錦標落袋喎。


雲格放尹佩斯 巴塞皇馬搶人？


不過世事邊有咁完美吖？睇番阿仙奴之前以2:1險勝新特蘭嗰場波，如果唔係亨利完場前靠經驗貢獻絕殺入球，根本就W唔出，依家呢位靈魂人物唔踢得，叫做靠得住啲嘅中堅哥斯尼又打埋柴，焗用佐羅孭飛，「配合」雞手鴨腳嘅門將施捷斯尼，呢條防線真係搵你要咯。




最重要一點，係西班牙《世界體育報》話，巴塞睇死阿仙奴好可能又4大皆空，準備夏天硬搶尹佩斯！皇馬嗰邊梗係唔執輸啦，佢哋亦乘機加入戰團，諗住賣希古恩去祖雲達斯，增加籌碼同巴塞拗手瓜！查實尹佩斯同阿仙奴張約到2013年夏天就完結，但遲遲未傾續約，難怪日前有英國傳媒爆料，話兵工廠已啟動超重量級收購計劃，準備買人頂替「尹隊長」，咁即係話雲格已經打定輸數放人，咁搞法，士氣隨時崩潰都有知。


新特蘭奧帥揸旗14戰3敗


對家新特蘭自奧尼爾入主後，由「黑貓」變做老虎，近14戰僅3負，代表作係喺聯賽主場以1:0打沉一哥曼城。雖然佢哋件前鋒賓特拿因借用條例所限，唔能夠喺今晚倒戈鬥阿仙奴，但新特蘭近11場只係得上仗臨天光失波，之前單場唔失多過1球，證明奧尼爾嘅防守戰術好使得，以「智多星」嘅性格，賴完嘢應該唔會再中招，下盤好路。


橫數千軍


 新特蘭盃賽旺開雙

‧連續3場足總盃開入球雙。

‧近5次對賽得1次保持清白。

 阿仙奴半場例失威

‧近7場有6次開入球大。

‧對上8戰得1次半場領先。

英總賽制：

今輪為第5圈（16強）賽事，若90分鐘內打成平手，需要重賽，重賽若在法定時間未分高下，要加時30分鐘，再和則互射12碼分勝負。