浦項細盤啱晒里

猪拉多纳

18/02/2012
文： 蘇豪

亞冠盃資格賽第二輪賽事，南韓勁旅浦項制鐵主場對泰國代表春武里，兩地聯賽水平差距大，春武里難爆冷，但韓職未開咧，浦項制鐵狀態一般，加上當地天氣凍，球員需時熱身，入球大細中位數改成3.5球，細盤有2.2倍分頭值博！（周六下午2時30分開賽、馬會網上文字直播）


春武里未夠班爆冷


泰國球會春武里搵齊援兵出戰亞冠盃，先後簽下法國中場杜蒙及喀麥隆前鋒盧杜域等外援，人腳唔算差，但拍埋南韓勁旅浦項制鐵質素始終差一截，今次作客出戰，就算有心想攻，相信亦難反抗，預計浦項制鐵可控制戰局，贏面極高，但主勝熱至1.02倍冇肉食，「讓球主客和」要「-3」風險高，揀唔落手。




浦項制鐵由索菲亞中央陸軍引入羅馬尼亞進攻球員施古，加埋加納快翼戴歷艾沙姆，外援質素贏晒。不過，現時南韓天氣凍到癲，今場開波嗰陣隨時得零度，春武里球員難以適應，浦項制鐵將士亦非機械人，於嚴寒天氣下難免走動較少，加上聯賽未開咧，要慢慢重拾比賽節奏，大細中位數3.5球，博細！




賽制方面，雙方九十分鐘賽和要加時，加時再和射十二碼分勝負，勝方可踢亞冠盃分組賽，負方則降格打亞協盃。