老細最緊要威曼城滅火龍

猪拉多纳

16/02/2012
文： 蘇豪

另一場衞冕冠軍波圖在火龍主場對曼城，曼城老細文梳亞燒錢搞波志在攞威，無論大小盃賽統統唔放過，主帥文仙尼養住一大班貴價後備兵，喺呢類場合可以大派用場。波圖今季失去靈魂人物保亞斯已成冇牙老虎，平手盤捧曼城！




（有線61及201台周五凌晨4時05分直播）




曼城老細文梳亞財雄勢大，入主後瘋狂燒錢購入大批球星，只為過捧盃癮，經過一輪磨合後，依家球隊已經「升呢」成為英超頂級勁旅，上季奪取英足盃，今季於聯賽榜首放領，戰績甚佳。曼城今屆於歐聯被編入死亡之組，最終畀拜仁慕尼黑及拿玻里壓住屈居第三出局，但表現絕對唔曳，今次降格踢歐霸盃，現時被莊家捧為大熱門，賠率仲熱過同市死敵曼聯，反映大軍備受睇好。


巴洛迪利餓搶波圖


曼城前線有人滿之患，射手迪斯高於聯賽上陣機會唔算多，今次有望喺歐霸盃被委以重任，另一箭頭巴洛迪利於英超停賽餓波多時，現時充滿飢渴感，相信對手後防有排煩。兼且曼城今場有托尼兄弟回歸，攻守力得以加強，有望於首回合爭取領先優勢。大軍經過早前低潮後，近期逐漸復甦，近兩戰全勝冇失波，攻守發揮對辦，絕對信得過！




波圖上季成功奪取歐霸盃，今屆矢志衞冕，不過球隊人腳變動甚大，最大影響係少帥保亞斯離隊，加上射手法卡奧他投，前線得番侯克孤軍作戰，作用有限，面對曼城隨時捱打，莊家開平手盤必捧曼城！