紅魔頭炮招積

猪拉多纳

16/02/2012
文： 蘇豪

曼市雙雄由聯賽鬥到去歐洲戰場，兩軍於香港時間周五凌晨征戰歐霸盃三十二強首回合，曼聯到訪阿積士，曼城則作客硬撼波圖。兩軍級數超班，轉戰歐霸盃有如虎入羊群，有望雙雙旗開得勝，其中曼聯十七年來首戰歐洲盃仔，相信唔會放過「千載難逢」捧盃機會，對住荷蘭褪色班霸有力反客為主！（有線61及201台周五凌晨2時直播）




自九五年起，曼聯一直參戰歐聯，相隔十七年後再度角逐歐洲盃仔（包括歐霸及其前身足協盃），自然極受矚目。




曼聯於歐聯分組賽爆冷出局後，唔少朋友認為紅魔會專注應付聯賽，不過球隊已於英聯盃及英足盃出局，依家聯賽爭標形勢接近，並無必勝把握，若然連歐霸盃都唔爭，分分鐘食白果，到時點向一眾粉絲交代？紅魔首要目標當然係爭英超冠軍，但大軍歐戰經驗豐富，以往踢歐聯都能兼顧到，依家只需要應付歐霸盃，雙線作戰對佢哋絕對冇問題。


阿積士遇強現形


曼聯兵源充裕，教頭費格遜預期會於今場作輪換，射手查維亞靴南迪斯近期畀韋碧克搶走正選位置，今次有望擔正攻堅，另外，中場湯卡華利已傷愈，今場應可披甲。由於曼聯已經喺英足盃出局，所以嚟緊周六、日唔使比賽，球員落到場冇後顧之憂，可以放心去盡，只要發揮正常，贏波機會非常樂觀。




荷甲近年水準下滑，班霸阿積士先後流失多位主力，已經不復當年勇，現時只屬歐洲三線球隊，分組賽主場對「皇家馬德里二隊」都要慘吞三蛋，進攻主力蘇利馬尼及布利堅等人於荷甲有惡氣，但出到歐洲戰場只屬普通貨色，難以威脅對手防線，受讓都信唔過，一於捧客W！

猪拉多纳