祖記唔放過帕爾馬

猪拉多纳

15/02/2012
文： 朱楓

今晚意甲上演兩場補賽，直播戲碼有祖雲達斯作客帕爾馬，記住捧1.68倍客W！近日盛傳祖記想搵卡比路入主兼加碼斟人，教練干地同一班球員當然係時候證明自己，帕爾馬只得好波之人基奧雲高撐場好難頂得住！（now633及660台周四凌晨1:30直播）




今場波原本安排喺本月1號舉行，但因風雪延至今晚上演，上輪祖記作客博洛尼亞又踢唔成，雖然依家打少兩場，但卻冇畀「一哥」AC米蘭放甩，暫時只係落後2分，今場贏波就可以重返榜首，戰意毋庸置疑。


傳斟卡比路入管理層


更何況祖記今季穩定到爆，係歐洲5大聯賽嘅唯一不敗之師，雖然戰績有保證，不過仍然傳出想搵前英格蘭主帥卡比路加入祖記管理層，又話嚟緊暑假會預備8,000萬歐元斟希古恩同馬里奧葛斯，試問教練干地同一班祖記球員聽到，今晚點會唔搏命保住自己嘅前途？




上半季表現飄忽嘅帕爾馬，自從上月換上前意大利領隊鄧納東尼執教後突然神勇，錄得2勝2和嘅不敗戰績，基奧雲高仲累積射入2球，被鄧帥形容為「新蘇拿」。但好老實講，帕爾馬除咗基奧雲高外，其餘球員質素都好一般，今晚「新蘇拿」倒戈母會一旦被成功凍結，帕爾馬肯定等死都似！