辛尼特雪地獵鷹

猪拉多纳

15/02/2012
文： 巨高

歐聯十六強首回合賽事，由俄羅斯球隊辛尼特主場對葡萄牙球隊賓菲加。最近歐洲大陸寒流吹襲，俄羅斯聖彼德堡喺過去一星期都處於攝氏零下十五度，西歐國家葡萄牙未必可以喺短短兩至三日適應嚴寒環境，天氣因素成為辛尼特最大爭勝本錢，主場讓「紅鷹」賓菲加平半捧上盤。




（有線61及201台周四凌晨1時直播）




漫天風雪之下，令歐洲唔少地方電纜損毀及水管結冰，就連道路及運動場亦受到積雪影響。據聞歐洲足協已經派專人飛到俄羅斯視察環境，以判定場地適合比賽與否。辛尼特係由俄羅斯最大天然氣供應商俄氣所支持，屬於一支財雄勢大球隊。近幾年辛尼特已於俄羅斯國內取得理想成績，幕後人士自然將目標定得更高，所講嘅當然係歐聯。


賓菲加捱凍難作惡


辛尼特於○八年贏得歐洲足協盃（現稱歐霸盃）之後，已揚言挑戰歐陸最高級別錦標，因此大家毋須擔心辛尼特嘅意欲。反正俄超要到三月先重開，辛尼特更可專心一志打歐洲賽。另有一項數據定必要提出，就係辛尼特近三次主場對葡超球隊錄得兩勝一和，場地因素對於俄國球隊都有一定幫助。




賓菲加雖有良好近績支持，但所擊敗嘅多數都係葡萄牙球隊，出國之後能否保持強勢就好成疑問，尤其俄羅斯正處於冰天雪地，「紅鷹」球員就更加難踢，辛尼特上盤捧得過。


歐聯密碼


2 辛尼特分組賽曾於主場擊敗另一支葡超球隊波圖，中場舒洛哥夫於該仗入2球。

3 賓菲加係3支分組賽不敗球隊之一，當中3場主場賽事更全部開細。

5 賓菲加中場奧斯華度加坦係今季歐聯助攻王，至今已交出5個助攻。