阿仙奴+1激襲AC

猪拉多纳

15/02/2012
文： 蘇豪

是日歐聯十六強首回合矚目決戰，意甲大軍AC米蘭於主場決戰英超代表阿仙奴，兩位昔日巴塞隆拿舊隊友伊巴謙莫域及亨利將作「最強前鋒」PK戰。AC近年患上「恐英症」，近七次對英超球隊未嘗一勝，當中包括07至08季度於歐聯十六強畀阿仙奴踢走。「兵工廠」擁有當弗射手尹佩斯擔大旗，借將亨利則上演告別戰，肯定唔想輸波掃興，今場有力抗擊對手，阿仙奴受讓「+1」，要「讓球客勝」！




（有線61及201台周四凌晨3時45分直播）


AC恐英症入骨


AC曾幾何時被視為歐洲超級勁旅，但隨住意甲水平下滑，於歐聯賽事已經冇晒惡氣，近年更畀英格蘭球會剋死，對上三次於歐聯十六強撞着英超球會都冇運行，上屆畀熱刺踢走，前屆兩戰曼聯輸晒，07至08季度被阿仙奴淘汰，三次主場出擊全敗，埋單計數，AC近七次於歐洲賽鬥英軍未贏過，其中五場冇士哥，08/09季度歐霸盃分組賽面對樸茨茅夫都贏唔到，完全冇符！




AC上場聯賽反勝烏甸尼斯，現時士氣甚佳，王牌前鋒伊巴謙莫域停賽令只限國內賽事，今次猛虎出柙，理應可以增加贏波本錢，但呢位瑞典「神鋒」經常於大戰隱形，難以予人太大信心。另外，AC傷兵問題續有改善，中場奇雲保定傷愈可候命，門將艾比亞迪及中堅尼斯達亦有機會復出，陣容尚算完整，不過，球隊「恐英症」非常嚴重，頑疾難醫，即使有主場之利，亦未必可打破魔咒。


槍王尹佩斯弗爆


另一邊廂阿仙奴「槍王」尹佩斯今季弗到漏油，產量極高，加上有兩隻快馬阿歷士張伯倫及禾確特支援，前線極具侵略性。「兵工廠」最大問題係把握力弱，老將亨利重投後解決問題，上場對新特蘭尾段士哥奠勝成英雄，今次臨別在即，無論正選或後備落場，都屬對手心腹大患。阿仙奴中堅梅迪薩卡因傷缺陣，但左閘基蘭基比斯已傷愈，華美倫可夥拍哥斯尼扼守中路，防線完整，可望頂住AC！


歐聯密碼


1 阿仙奴係第1支作客擊敗AC米蘭嘅英格蘭球隊，當時為07/08歐聯16強，之前AC米蘭11次主場鬥英兵取得7勝4和

3 阿仙奴近12場歐洲賽作客賽事僅得3勝

4 兩軍最近4次於歐洲賽交手入球均開細

6 AC米蘭3場主場分組賽共入6球，前鋒伊巴謙莫域3場都有士哥