利華巴塞駁火做大Show

猪拉多纳

14/02/2012
文： KIT

相信今晚係近年最浪漫嘅一個歐聯夜，有情人嘅朋友，食飽飯返到屋企可以溫馨住一齊睇波；無情人嘅都唔愁寂寞，今晚一於同班兄弟姊妹唱K飲嘢直落睇美斯，咁Happy梗係博呢場利華古遜對巴塞嘅16強首回合，會多波入開個1.62倍入球大啦！（有線61、64、201、204及中央5台周三凌晨3:45直播）




歐聯16強首回合今晚開火，利華古遜陣前傳嚟壞消息，話老將波歷克訓練期間受傷要抖4個禮拜，好彩佢今季唔多受重用，缺陣對利華嘅影響唔算太大。利華歇冬後成績一般，喺歐聯仲要抽籤失利撞正大熱門巴塞，相信佢哋已經做好出局心理準備之餘，今晚都會大膽放手一搏力求偷雞，起碼要爭取表現向班主場球迷交代。




其實鬥攻都可以話係利華今戰嘅唯一出路，事關佢哋今季後防失波頻頻，主場失球數字達到15球係德甲第4差，聯賽主場平均每場失1.5球，以一隊出戰歐聯嘅勁旅嚟講無疑唔合格，相信呢個亦係佢哋喺今季德甲只能夠暫列第6嘅主因。今場利華雖然繼續有進攻主力悉尼森姆、戴迪約克因傷缺陣，好在歇冬後主場兩戰入5球，傑斯寧同舒賀爾尼組成嘅鋒線總算信得過。


美斯 沙維 法比仔復任正選


對手巴塞今季聯賽作客表現都幾飄忽，近期對住弱旅奧沙辛拿甚至維拉利爾都要失分，佢哋家陣喺西甲落後皇馬10分，主帥哥迪奧拿啱啱先喺記者會暗示今年西甲爭標「瓜多過菜」，更加講到明話最大目標唔係西甲而係衞冕歐聯，可以預計佢哋呢兩個回合會砌到盡。




喺啱啱輸畀奧沙辛拿場波休戰留力嘅恩尼斯達、沙維同法比加斯，今場應該會復任正選。以「地上最強」嘅火力而言，今場要入波肯定無難度，而主隊利華又冇理由喺主場死守咁失威，所以都係咪咁傷腦筋去諗邊隊贏，簡簡單單捧個入球大最實際！


橫數千軍


 利華近戰多失波

‧近23場賽事只得5場冇失波，近3戰就失咗4球。

‧近7場正式比賽得1勝4和2負。

 巴塞分組賽士哥平紀錄

‧美斯以6球排歐聯射手榜首。

‧之前分組賽勁入20球，追平曼聯喺98-99年度所創紀錄。

歐聯賽制：

採主客兩回合淘汰制，今輪為16強首回合，若總比數相同，作客入球較多一隊晉級，再和則於次回合後加時作賽。若加時入球數字相同，客隊將憑作客入球優惠晉級，若加時沒有入球，則需互射12碼決勝。