卡素爾熱Ｗ啱胃口

猪拉多纳

14/02/2012
文： ComboKing

今日歐聯同歐霸都重開，大部分人焦點都會喺嗰度，但其實今日都有英冠同英甲快車，阿King認為呢啲聯賽菠菜價值唔比歐洲賽低，所以今日主力研究英甲，最靚心水係卡素爾，對住作客八連敗嘅燦美爾，主Ｗ有1.68倍實屬超值。（周三凌晨3時45分開賽）




英甲嚟到二月，打咗一半多少少，大致形勢已定，邊啲球隊有機會爭升班，邊啲要護級，下半季目標明確，卡素爾現時排第七，未來主要都係爭升班附加賽資格，今仗對住燦美爾，必以全取三分為目標。




卡素爾主場威力強勁，上仗對車士打菲特半場落後一球都可以反勝二比一，球隊有韌力又有鬥志，係低組別球隊取勝必要因素，相反燦美爾每次作客都照攻，可惜實力未夠班餐餐都唔夠砌，連盃賽已經作客連輸八場，卡素爾個主Ｗ幾穩陣。


奧咸啞火繼續獻「細」


另外兩關都係揀埋英甲，奧咸主場對華素爾揀細，奧咸近排啞火，近四場有三場入唔到波，至於華素爾亦係攻力不足，今場入波唔會多。至於錫周三主場對史提芬納治要「讓球客勝」，雖然錫周三排聯賽第二，但史提芬納治近況托弗，作客十場都未輸過，有望搶分而回。