尼科西亞做里昂細界

猪拉多纳

14/02/2012
文： 笛子波童

歐聯十六強首回合另一場賽事，由新丁塞浦路斯尼科西亞作客挑戰法國里昂，尼科西亞分組賽能夠力壓波圖、薩克達等歐聯常客奪得首名絕非僥倖。里昂今季主場成績唔算特別標青，就算經驗稍勝亦未必可以輕鬆贏波。既然今場只係首回合，相信大家都會比較保守，波童揀入球細。




（有線62及202台周三凌晨３時45分直播）


尼軍唔係人咁品


尼科西亞今屆歷史性首次打入歐聯十六強，過程並不符碌，分組賽面對波圖、辛尼特及薩克達完全冇怯場，如果唔係踢完頭五輪已肯定出線，最後一場未必會放軟手腳輸畀薩克達。




里昂連續第九屆進身淘汰賽階段，講經驗一定贏晒對手，不過隨着佢哋近年於法甲失勢，球員似乎冇餘力兼顧兩邊戰線，歐洲賽演出明顯冇以前咁Sharp醒。今屆分組賽除兩勝魚腩薩格勒布戴拿模，面對同級嘅阿積士都贏唔到。球隊上周末聯賽於主場以一比二不敵卡昂，一眾主力包括利辛度盧比斯、巴菲迪比高美斯、拜恩特、米高巴斯圖斯等等都有落場，狀態平平，就算贏波相信都要花一定工夫。