巴塞情人節博翻身

猪拉多纳

14/02/2012
文： 蘇斯黑柴

歐聯16強於香港時間周三凌晨強勢開戰，適逢今日係情人節，唔想年年都燭光晚餐咁鬼悶，不妨「以波會友」，度過刺激、浪漫難忘一夜。今晚先演兩仗，重頭戲德國利華古遜主場迎戰衞冕嘅西班牙巴塞隆拿。巴塞目前於西甲形勢不利，已落後死敵皇家馬德里十分之多，作為「地上最強」要捍衞王朝，對歐聯志在必得，即使作客亦足以擊倒實力走下坡的利華古遜，巴塞踢法主動，尤其歐聯例做急先鋒，今場客勝熱到乏味，黑柴吼巴塞「半場勝」。（有線61及201台周三凌晨3時45分直播）




巴塞踏入2012年狀態下滑，聯賽已先後被愛斯賓奴同維拉利爾逼和，上仗更作客以二比三敗於奧沙辛拿腳下，基於皇馬昨日凌晨擊退到訪的利雲特，近18輪聯賽贏咗17場，令雙方差距已拉開至十分，巴塞要喺餘下16輪聯賽後來居上，機會已經十分渺茫。正因為咁，教練哥迪奧拿於部署上更重視歐聯，上輪對奧沙辛拿之戰，安排兩名剛傷愈的核心沙維同恩尼斯達擔任後備，即使下半場形勢不利，亦冇安排佢吔入替，而另一名中場法比加斯亦只後備上陣踢咗二十分鐘，擺明留力等今仗。


情傾巴塞半場勝


事實上，巴塞上仗表現雖然失準，但下半場仍有大量機會平反敗局甚至反勝，只係未獲幸運之神眷顧，加上球證兩個問題越位球都對巴塞不利，最終落敗相當慘情。




巴塞今仗強陣作客，除養傷多時嘅韋拿、阿費利同埋踢完非國盃嘅施度基達未有隨軍，已帶上全部主力，包括仍需賽前體檢嘅防守中場布斯基斯，球隊實力超群之餘，亦喜歡在歐聯做急先鋒，近五場歐聯全勝外，亦全部於半場領先對手，今晚面對實力一般嘅利華，當然唔會同你客氣，黑柴情傾巴塞半場勝。


利華殘陣跌晒Watt


利華係上季德甲亞軍，但今季失去老帥軒歷基斯後實力跌Watt，目前聯賽排第六，已落後榜首多蒙特15分，新帥杜特始終未能駕馭球隊，近三場聯賽未贏過狀態低沉，加上傷兵滿營，除原有傷兵艾達、巴尼達、悉尼森姆同戴迪約克外，於今屆歐聯分組賽踢足兼最富經驗嘅波歷克，亦剛於周日操練中拉傷，今仗無緣上陣，令杜特手上可供調動嘅兵源買少見少，雖然巴塞近屆聯戰作客德國成績一般，但目前嘅利華實力根本唔夠地上最強砌。


歐聯密碼


1 里昂16強主場賽事只輸過1場，過去賽績4勝3和1負

3 尼科西亞三場分組賽作客全和

4 里昂過去5屆有4次歐聯16強止步

6 尼科西亞6場分組賽只入6球

94 尼科西亞唯一對法國球隊係1994年歐洲盃賽冠軍盃對巴黎聖日耳門，總比數輸0:3