紐記復仇打落水狗

猪拉多纳

11/02/2012
文： 郭球奇

今晚英超除咗雙紅會之外，其實壓軸嘅熱刺主場對紐卡素一樣好有睇頭！兩隊今季都有超水準演出，不過熱刺領隊夏利列納近日受挖角傳聞困擾，而且陣中主力傷兵唔少，對住有番「Demba雙煞」火力急升嘅「喜鵲」，隨時複製往績，進取啲可直取客W，穩陣嘅2.85倍「讓球客勝」亦甚值博！（有線200及300、廣東體育周日凌晨1:30直播）




熱刺今季表現令人驚喜，長期位列三甲，被視為爭標奇兵，不過隨住夏利列納早前捲入逃稅風波，呢支倫敦球隊近期成績明顯受到拖累，對上4場聯賽得1勝2和1負，啱啱周一作客利物浦一戰更異常沉悶，同季初嗰支進攻水銀瀉地嘅球隊，根本係兩班波。


熱刺4主力未必踢得


原本夏利列納啱啱獲無罪釋放，熱刺擁躉應該飲得杯落，點知轉過頭英格蘭領隊卡比路突然辭職，朗尼同里奧費迪南等球星立即齊齊推舉夏列叔接任。其實夏利叔以往曾多次透露好想教「三獅兵」，家陣機會嚟到，試問佢點會唔心郁？球季中途整單咁嘢，肯定影響到熱刺嘅軍心，加上前鋒迪科爾、中場雲達華治、艾朗連儂同中堅卡保奧4大主力今晚都未必趕得及復出，熱刺真係有多少暗湧o架！




同熱刺相反，對家紐卡素近排似乎開始重拾季初嗰股銳氣，上周主場對維拉，丹巴巴亞同柏比斯施斯兩大非洲兵一返嚟就齊齊有士哥，當中施斯更係處子上陣就射入世界波。雖然「喜鵲」今仗有卡比耶繼續停賽，迪奧迪踢非國盃，又新增前鋒貝斯同中場賴恩泰萊兩名傷兵，但頂替佢哋嘅古費利、白治同奧巴坦其實近況都唔曳，再睇埋紐記近6次作客熱刺，連續輸完2場後贏番兩鋪，照「喜鵲」上兩次作客白鹿徑都輸波嚟睇，今晚應該係報仇嘅好機會！


「喜鵲」近6次作客熱刺成績


日期 戰果




10/12/28 熱　刺 2:0 紐卡素

09/04/19 熱　刺 1:0 紐卡素

08/03/30 熱　刺 1:4 紐卡素

日期 戰果

07/01/14 熱　刺 2:3 紐卡素

05/12/31 熱　刺 2:0 紐卡素

05/04/10 熱　刺 1:0 紐卡素