巴塞又開大餐

猪拉多纳

11/02/2012
文： 法比加輝

今輪西甲有奧沙辛拿主場對巴塞隆拿，呢次已係兩軍今季第四度碰頭，奧沙辛拿可算係巴塞嘅「私房菜」，前三場「地上最強」合共射入對方十四球，例牌「開大餐」！事實上奧沙對親巴塞經常持放棄態度，今場好可能又再主動中門大開任人魚肉，加輝建議捧入球大。（now 632周日凌晨3時直播）


奧沙辛拿今季三對巴塞都輸波，而且戰況慘烈，首循環聯賽淨吞八隻光蛋，之後西班牙盃首回合輸○比四，次回合就輸一比二，今季喺巴塞身上合共失咗十四球咁多。其實大敗都唔係冇原因嘅，事關奧沙一向都鍾意揀波踢，每季目標都只係護級，根本就唔介意失分畀強隊，寧願留力喺中下游分子身上搶分，所以對巴塞、皇馬咪輸到傻囉，好似首循環就輸過畀「銀河艦隊」一比七嘞！

恩尼斯達回歸殺氣更盛

由於巴塞喺聯賽落後皇馬七分之多，所以就算有歐聯後顧都唔理得咁多，今場一定要爭勝。巴塞賽前收到好消息，布斯基斯傷愈可復出，而另一中場大將恩尼斯達則已在周中西班牙盃復出，今場可復任正選，巴塞可以強陣出擊。奧沙辛拿蜜月期已過，佢哋最近亦陷入今季低潮，狀態差更加難抗巴塞，睇怕今場都係大炒格，大盤有1.55倍勝在夠穩陣！