拖肥升呢強勢截車

猪拉多纳

11/02/2012
文： 張志德

英超名牌車路士今輪作客愛華頓，「車仔」上仗贏住三球都畀曼聯逼和，主帥保亞斯畀老細阿布連環照肺，隊內氣氛好曳，加上射手費蘭度托利斯唔生性，造訪愛華頓難贏，鬼Sir推介「讓球主勝」！


（有線201及301台周六晚11時直播）

愛華頓往績有利

車路士上次對曼聯一度領先三球，點知畀「紅魔鬼」大反擊逼和三比三，球證韋比判決確實惹人爭議，但「車仔」球員精神面貌亦確係麻麻，射手托利斯繼續做花瓶，前面得桑馬達較為生性，就算中場重心林柏特及左閘艾殊利高爾今仗可復出，相信都幫唔到幾多。主帥保亞斯民望插水，仲要畀阿布多番照肺，前途黯淡。


另一邊廂「拖肥糖」愛華頓早前引入當路雲及吉遜等新兵後，中前場人手調配空間更大，仲有個秘密武器謝拉域未用，前線威脅力唔弱。愛華頓向來實而不華，主場演出非常硬淨，前仗主場戰勝榜首球隊曼城，表現冇花冇假，今次對住「車仔」完全未驚過，就算卡希爾及魯迪維爾等主力有傷上陣成疑，影響都唔算好大。


睇埋往績，計晒聯賽同盃賽，愛華頓近五次主場對車路士未輸過，對上兩次英超主場對「車仔」贏晒，受讓值得捧場！


本港至型足球明星，519入波功臣，現為有線電視台柱級資深講波佬，人稱鬼Sir。鬼Sir睇波有乜獨到見解，毫無保留話晒你知。