紐卡素唔怕熱

猪拉多纳

11/02/2012
文： 蘇豪

蘇豪除日本波，對英超亦深入鑽研，未來會為大家帶來更多好介紹。今次先講周日凌晨熱刺主場對紐卡素，兩軍今季成功「升呢」，熱刺穩坐第三位，第五位紐卡素亦有機會爭奪歐聯入場券，理論上今仗應勢均力敵，但莊家對「喜鵲」綜合評級甚低，熱刺主W竟熱到得1.34倍，蘇豪認為兩隊差距並非如賠率反映般大，紐卡素「讓球客勝」相當值博。


（有線200及300台周日凌晨1時30分直播）


熱刺今季表現平穩，目前領先第四位車路士七分，只要保持水準，可穩入四強，不過蘇豪留意到熱刺近期入球量下降，其入球數字遠不及曼徹斯特雙雄甚至阿仙奴，加上領隊夏利列納盛傳離隊執教英格蘭，賠率熱成咁真係玩唔過！

熱刺傷困跌Watt

事實上，熱刺近期出現唔少傷兵，雲達華治、迪科爾有傷上陣成疑，艾迪巴約一直帶傷上陣，踏入新一年更未入過波，大大加重其他進攻球員負擔，最慘係熱刺防線一向唔多穩陣，今仗面對狀態大勇嘅「塞內加爾孖寶」丹巴巴亞及柏比斯施斯，有乜差池隨時爆冷失分！


紐卡素狀態再度回勇，近五場聯賽贏四場，丹巴巴亞及柏比斯施斯歸隊後，上仗登場即刻有波入，蘇豪對呢個進攻組合相當期待。其實紐卡素對熱刺一向係五五之爭，近十次交手熱刺僅贏過三場，所以紐卡素今場真係有權喺熱刺身上搶分！