拉魯斯搶W壯行色

猪拉多纳

10/02/2012


對今季要護級嘅聖羅倫素嚟講，首輪聯賽立即作客拉魯斯絕非好事，事關拉魯斯係近季阿甲表現最穩定球隊之一，兩軍對上7次碰頭拉魯斯共取得6勝1和壓倒性優勢，聖羅倫素想搶分難度極高，今場捧拉魯斯主W。（開賽時間：周六早上8:15）




阿甲降班制度係計算近3季平均分，聖羅倫素目前排平均分榜尾3，只比尾2嘅堤格雷多0.1分，深陷降班危機。聖羅倫素自從贏過08至09年春季冠軍後，近年長期積弱，今季19場春季聯賽輸咗10場，輸波次數係聯賽第2多，表現並不可靠，何況佢哋今季只係由墨西哥球隊克雷塔羅，借用咗個烏拉圭前鋒般諾，冇進行大換血，又點可能脫胎換骨吖？


拉魯斯周中鬥法林明高


拉魯斯於護級平均分榜排第4名，足以反映佢哋過去3年聯賽成績好穩定，而且佢哋對上7次面對聖羅倫素取得6勝1和，心理上佔上風。拉魯斯除咗有前意大利國腳甘莫蘭尼斯坐鎮，前鋒殺手曉高柏禾尼都曾响西甲打出名堂，實力非凡，進攻火力有保證。雖然射手列古路肯定養傷缺陣，守衞高列斯同甘莫蘭尼斯都未係十足狀態，下周中又要喺自由盃出戰巴西勁旅法林明高，不過佢哋連續兩場都係主場出擊，免除舟車勞頓，反而為壯行色，相信今場會全力搏殺，唔會有保留，主W可捧。