勝利硬淨唔赦水手

猪拉多纳

10/02/2012
文： 立民

搞球會真係同燒錢冇乜分別，一般都係靠轉播費同商業贊助取得收入。成個業界惟有千方百計去開源，希望可以球賽生財。有啲球會就會趁抖暑或者歇冬外遊搵真銀，又或者同賽會加強電視製作合作，推出埋3D球賽直播！




講起3D直播，小弟有幸呢兩個禮拜連續評述3D大戰，聽晚又有份講曼聯對利物浦。上星期首次接觸感覺新鮮，官能刺激強勁，不過對評述員反而係挑戰，因為拍攝角度較平，講波都要重新適應，原來都係做觀眾幸福啲！




英超係世界上辦得最成功嘅足球聯賽，觀眾多，收入多，澳職成日都想效法。就以搵贊助為例，布里斯班獅吼係第一支被印尼財團全面收購嘅球會，財力有機會同墨爾本勝利及FC悉尼睇齊。反而榜首嘅中岸水手，依家面對內憂外患，手緊之外，教頭阿諾特仲篤定下季走人，而且踢聯賽之餘，嚟緊兩個月重要應付亞冠盃，成績必定反覆。


主場不敗受讓筍


水手今日作客墨爾本勝利，勝利就唔使擔心錢銀問題，球會為穩固軍心，爭上頭六位入季後賽，依家已經同重心球員續約！勝利近況雖然唔算好好，但都叫做保持三場不敗，何況今季聯賽主場未輸過，取得三勝八和。今仗遇上新敗嘅中岸水手，仲有得受讓平半，我就捧主隊下盤，講唔定會有驚喜畀到大家。




（有線64及204台周五下午5時直播）


立民推介


墨爾本勝利 Vs 中岸水手

墨爾本勝利（下盤）

phone波熱線：1831 678

電郵：soccer64@cabletv.com.hk

「球盤龍門陣」開放時間：晚上10:30至晚上11:50