拜仁訪史特加入球停不了

猪拉多纳

08/02/2012
文： 朱楓

今晚德國盃續演8強激戰，大熱門拜仁慕尼黑將會作客史特加。即使拜仁將缺少翼鋒洛賓，不過射手馬里奧高美斯近年倒戈例必有好表現，對住由「轉型射手」舒希巴帶領嘅史特加，仍然有本錢開1.57倍入球大！（無綫翡翠台周四凌晨3:30直播）


唔知係咪因為近排德國天氣實在太凍，凍到班球員手腳僵晒，拜仁喺歇冬後表現明顯冇上半季咁流暢，就好似日前作客漢堡，射門雖然多達22次，都係搞到幾經辛苦先逼和對手1:1，將聯賽榜首位置送咗畀多蒙特。


喺對史特加前，拜仁翼鋒洛賓因第3次做老竇，已經請咗假陪妻兒，不過朱楓依然睇好拜仁今晚可以重新撻着，皆因翻查數據，前鋒馬里奧高美斯近年倒戈母會史特加超醒神，已連續4次交手有波入唔在講，加埋仲足足入咗7球，順到你唔信。

近年對史特加例大手交易

相比起拜仁，對家史特加喺歇冬後表現仲曳，但日前總算止血，作客逼和利華古遜2:2，當中前鋒舒希巴客串左翼仲射入一個超靚罰球，取得由紐倫堡回歸後第1球，賽後呢位新星話練咗踢左翼已經成個禮拜，好感激教練信任畀佢打呢個位，配合踢完非國盃歸隊嘅中場伊巴謙查奧爾，今晚實在有本錢同拜仁鬥攻。事實上，史特加近5次對拜仁均大手交易，而且不乏5:3同6:3等驚人戰果，今晚捱眼瞓睇呢場直播，真係隨時追大追到笑。