科特迪瓦威畀「里」睇

猪拉多纳

08/02/2012
文： 查理阿蛋

馬里今晚喺中立場加蓬，遇着星光熠熠嘅科特迪瓦注定冇運行！由巴塞隆拿中場施度基達領軍嘅馬里爆冷殺入四強，卻遇着剋星兼鬥志高昂嘅科特迪瓦，無論氣勢、質素定往績通通輸晒，2.35倍「讓球客勝」博得過。（now676台周四凌晨3:00直播）

馬里近21次交手僅1勝

曾被視作陪跑分子嘅馬里憑驚人信念打入非國盃4強，但係佢哋過去同科特迪瓦交手21次只贏過一次友賽，今仗難免被睇低一線。賽前馬里中場施度基達認為往績唔代表一切，不過小妹覺得科特迪瓦今場大熱倒灶嘅機會甚低，全因佢哋嘅鬥志極盛！「魔獸」杜奧巴對於06年喺準決賽輸畀埃及記憶猶新，一早表明唔會重蹈覆轍，中場耶耶托尼更表示要為人民而戰：「希望我哋可以將個盃帶返祖國啦！」

「莫連奴式」打法夠硬淨

科特迪瓦今屆顯示出王者風範，4戰全勝之餘更1球未失，同領隊沙侯爾採用「莫連奴式」硬淨踢法大有關係，呢種戰術雖然唔算悅目，不過就可以將一眾英超兵嘅身體對抗性發揮得淋漓盡致，防守出色之餘，一條星級前鋒線更加銳不可當，馬里今次想偷雞就難啲喇！