錫周三有心唔怕池

猪拉多纳

07/02/2012
文： 麥馬拿仁

周三凌晨有兩場英格蘭足總盃第四圈重賽，英甲錫周三主場鬥英冠黑池。呢對歡喜冤家早前於英聯盃碰頭，「貓頭鷹」曾淘汰黑池；上仗作客亦幾乎贏埋。錫周三本季主場勁爆，不敗率九成四、勝率超過七成，黑池心繫升班唔會夫添應戰，捧主W！（now 671及672周三凌晨3時45分直播）




以波論波，當然係黑池秤先，但球隊本季目標係爭升上英超，現時英冠排第四，領隊荷路維唔會於盃賽太過費力，英聯盃作客錫周三就半力出擊，最後射輸十二碼出局；而上次主場鬥錫周三，亦僅派四名常規正選落場，如非菲臘斯於完場前轟入十二碼，都未必能逼和錫周三，取得重賽機會。




錫周三領隊加利麥臣有料到，此名前保頓領隊成功營造主場超強威力，本季十七場主場比賽贏十二場，只曾輸過畀一哥查爾頓。翼鋒謝明莊臣大勇，近五仗入四球，今次主場必遣強陣出擊，力足贏波過關。


修咸頓主場誓反彈


另一場足總盃英冠對碰，修咸頓主場鬥米禾爾，上次「聖人」作客完場前臨尾香被逼和，贏唔到唔抵，雖然近期佢哋表現不如季初，但四場不勝後球隊都希望於主場反彈，米軍作客不濟，捧主W。