馬體會乘勢嚼華倫

猪拉多纳

05/02/2012
文： 鄭少偉

呢個星期歐洲唔少賽事都因受大風雪影響而取消，各位讀者喺刨波嗰陣記得留意埋天氣預報嘞！講到今輪西甲最強戲碼，一定要數今晚呢場由近況回勇嘅馬德里體育會主場迎戰「三哥」華倫西亞，馬體會易帥後愈戰愈勇，主W有1.8倍值博！（now632台周一凌晨4:30直播）


西班牙位處歐洲南部，大風雪都影響唔到佢哋幾多，係就係凍啲，但難得馬體會同華倫嘅鋒力強勁，戰術又主攻，兩雄相遇唔理誰勝誰負，都肯定好睇過戲。開波時間對大家嚟講，無錯就係難頂啲，不過咁好戲碼，又點可以走雞呢？一定要捧場啦！

近4場3勝1和冇失波

捧場！捧場！咁呢場「亨利」又會捧邊隊場呢？答案就係近況順番晒、聯賽連Win 3場嘅馬體會喇。馬體會班波自從換咗由舊將施蒙尼執教之後，成隊好似脫胎換骨咁，近4戰錄得3勝1和兼零失球，連之前聯賽作客不勝嘅肉酸紀錄都終結埋！成績好咗，原因無他嘅，防守改善咗冇失波此其一；班球員比之前賣力，落到場鬼咁好火先係關鍵。難得施蒙尼亦好識做，上場贏波後勁讚班愛將搏命，無話自己獨攬功勞，抵班兵咁撐你嘅！

華倫留力西盃鬥巴塞

對家華倫排第3固然係堅，不過想爭聯賽冠軍家陣就真係窄咗啲，倒不如諗計留力博個西班牙盃仲實際，過幾日就要喺4強作客魯營砌次回合喇，今場波嘅戰意真係好難估，倒不如望馬體會順開有條路，再開W好過！