曼聯平手盤爆車

猪拉多纳

05/02/2012
文： 樂比堅尼

今晚英超重頭戰，車路士主場對曼聯。車仔目前最欠缺嘅就係信心，近幾次對曼聯都輸到頭耷耷，加上幾名主將缺陣，陣容不整面對全力衝刺爭標嘅曼聯，睇怕都好難從谷底反彈，平手盤捧曼聯好正路！（有線200及300台周一凌晨零時直播）


反車路士五大理由


樂比仔捧曼聯有五大原因，首先係車路士實力今非昔比，重心球員已開始老化，同前幾年當打嘅時候相差好遠，而新加盟嘅球員又未起到預期嘅作用，所以每次鬥曼聯都踢得好辛苦，睇番兩隊近六次交手，曼聯贏咗五次，唯一輸嗰次係踢少一人，兼判咗個問題十二碼，喺正常嘅情況下，車仔依家要贏曼聯係需要奇迹！




第二係車路士陣營內氣氛極差，喺莫連奴及安察洛堤時代，車仔上下都做到一條心，但隨着費蘭度托利斯、大衞雷斯、保亞斯等人加入，車路士經常傳出分黨分派嘅新聞，更衣室內嘅氣氛冇以往咁和諧，連保亞斯都承認自己年紀太輕，壓唔住班大佬，士氣差心態曳，好難同霸氣十足嘅曼聯鬥。




第三係車仔今季遇強即屈，以往車仔出名硬淨，而且遇強愈強，但今季對親強隊都冇好收場，作客輸畀曼聯唔怪佢，但兩次輸畀利物浦，主場畀阿仙奴入五粒，絕對係唔能夠接受嘅戰果。


A高泰利杜奧巴缺陣


第四係陣容不整，泰利及拉美利斯因傷缺陣，艾殊利高爾停賽，杜奧巴及沙洛文卡勞離隊踢非國盃，以上缺陣球員大部分係球隊嘅骨幹，最慘係林柏特亦有傷上陣機會唔樂觀，冇人會預期上次對曼聯世紀miss嘅「費托」可以交到功課！




最後係曼聯本身有唔少利好消息，包括主將朗尼同拿尼復出，令球隊鋒力大增，加上上周中快車擊敗史篤城，而宿敵曼城又輸波，依家同曼城同分（未計昨晚賽事）爭標叮噹馬頭，每場都要當決賽咁踢，爭標無望嘅車仔贏一場唔多，輸一場唔少，今場睇怕都難當攔路虎！