阿仙奴布力般「大」晒冷

猪拉多纳

04/02/2012
文： 張志德

近期阿仙奴新聞多多，成績下滑令領隊雲格有下台壓力，而冬季轉會窗球會冇大動作買人，亦都激起球迷公憤，準備於今晚英超主場對布力般流浪賽事留空一堆座位，擺放黑色膠袋以示不滿，仲計劃大唱《We want our money back》歌曲洩憤。兵工廠狀態的確麻麻，但尹佩斯仲係好弗，而布力般亦唔會死守，今戰捧大。




（有線 200及300台周六晚9時直播）




阿仙奴連續四場聯賽不勝，依家僅排英超第七，而且於剛過去嘅冬季轉會窗冇大手收購球星，令一班球迷非常鼓譟。佢哋話球會高層一方面不斷加票價，但另一方面就唔肯花大錢買人，咁樣係於理不合，所以要唱歌嗌回水。上仗阿仙奴作客保頓，細鬼有做現場評述，阿仙奴表現唔算曳，但禾確特等攻擊手狀態一般，搞到尹佩斯要單天保至尊。但話時話尹佩斯的確有料到，以一人之力已經搞到對手後防風聲鶴唳，如非又中楣又中柱，阿仙奴已擸走三分。今次回歸主場，細鬼睇好兵工廠「炮炮應棍」，可在布力般身上數番幾球。


布力般作客全入波


去到球季中段，下游球隊都不能坐以待斃，因為求一分對護級幫助不大，所以布力般就算作客都會全力出擊求勝。呢班波好有球味，本季所有客場聯賽都有波入，今場同兵工廠快打快下，開大可期。




本港至型足球明星，519入波功臣，現為有線電視台柱級資深講波佬，人稱鬼Sir。鬼Sir睇波有乜獨到見解，毫無保留話晒你知。