艦隊起「菲」搶得就搶

猪拉多纳

04/02/2012
文： 山度士

西甲盟主之爭下半季進入白熱化，現時皇家馬德里領先巴塞隆拿七分，理論上形勢大好，不過，睇番英超之前曼城都曾經領先過曼聯好多分，依家都一樣被追到同分，所以皇馬都唔可以話坐定粒六，始終聯賽流流長，下半季有乜事發生都未知，最好趁現階段傷病唔多盡量搶分，今輪作客基達菲必定繼續搶。（now 632周日凌晨3時直播）




度士好記得喺電視睇過，西班牙盃次回合賽後記者會，皇馬教練莫連奴被問到如果今季攞到聯賽冠軍，但一場都未贏過巴塞隆拿覺得點？佢諗都唔諗，記者個問題未問晒已經搶答：「I feel great！」除咗話佢寸之外，其實某程度上睇到佢都係目標為本之人，最緊要攞冠軍，中間枝節唔太執着。




現時皇馬只得兩個目標，就係西甲同歐聯，歐聯再下一個星期就會重開，肯定對球隊部署有影響，所以皇馬現時當然搶得就搶，以莫連奴性格，今場肯定唔留手。


基達菲皇馬私房菜


事實上，皇馬今仗對手基達菲可以話係私房菜，近六次對賽全部贏晒，而且場場大手成交，相信今日皇馬除咗贏波，亦會有好多入波鏡頭，大家可以準備睇入球騷。




前香港足球先生，畀料同佢做人一樣，百足咁多爪，對唔同聯賽都有興趣。教波同貼波，一樣做阿哥。