巴塞官網死撐 5招翻身！

猪拉多纳

01/02/2012


巴塞聯賽已落後皇馬七分，大部分輿論都唔睇好佢哋反超前。會方為激勵士氣，罕有喺官網列出球隊可以後來居上奪西甲冠軍嘅五大理由。




1 堅信巴塞有冠軍命，因為球隊過去三季參加十六項賽事，奪得十三個冠軍，包括聯賽三連冠，屬於真正王者，而且今季仲有次循環鬥皇馬，有信心再擊敗對方。




2 巴塞今季聯賽主場成績極佳，十戰取得九勝一和，入四十三球只失兩球，其中首九輪保持不失，未來得分有保證。




3 作客成績有提升空間，雖然十場作客只有四勝五和一負，比以前退步，但仍屬西甲作客第二佳球隊，只要餘下作客表現有改善，可帶來大量「額外」分數。




4 傷兵問題日漸改善，會方預期恩尼斯達、柏度洛迪古斯好快可以復出，等施度基達踢完非國盃歸隊後，人腳會更完整，長期傷兵韋拿及阿費利亦可望於季尾爭標最後階段復出助陣。




5 巴塞曾於91/92、92/93、93/94球季，都係處於劣勢艱辛情況下，後來居上奪得冠軍，有信心可以歷史重演。