祖記「帕」板強搶客W

猪拉多纳

31/01/2012
文： 查理阿蛋

不敗斑馬，勇不可擋！今晚意甲一哥祖雲達斯作客帕爾馬，面對AC米蘭步步進逼，小妹相信有柏比及馬治斯奧復出嘅「斑馬軍團」，定必搏盡搶3分保住領先優勢，捧1.64倍客W就最穩陣。（now633及660台周三凌晨3:45直播）


意甲「老婦人」絕對唔好恰，上仗即使有輕傷嘅柏比及馬治斯奧退居後備，仍憑狀態大勇嘅馬特尼梅開二度，殺敗烏甸尼斯，繼續向稱霸聯賽嘅目標進發。雖然祖記今季仲未輸過波，不過面對窮追不捨嘅AC，一眾「斑馬兵」亦未敢掉以輕心，守將巴沙利仲話：「意甲錦標嘅競爭好激烈，未捧到盃前，我哋仍然唔敢放鬆。」

帕爾馬射門命中率奇低

火腿係帕爾馬市土產，點知今季連隊波都變晒豬腳，門前把握力弱到喊，近2場每仗起腳成10次，中目標嘅就只得1、2次，搞到教練鄧納東尼賽前都死死地氣話：「我哋只差埋門一腳，仍然有好大進步空間。」即使新兵奧卡卡卓卡質素不俗，但融入球隊需時，今仗面對防守力冠絕意甲兼着重控球嘅祖記，有冇機會起腳都成問題。

柏比 馬治斯奧復任正選

今場波祖記極有可能畀柏比及馬治斯奧復任正選，進一步加強攻擊力，但睇番往績，祖記今季作客贏波通常都係小勝，鐵衞基亞連尼亦承認自己隊波仍有不足：「如果我哋要實現奪冠夢想，就必須繼續進步。」照咁睇，博佢哋大炒開2.9倍「讓球客勝」，略嫌進取咗啲，不過小妹深信「斑馬軍團」要搶W係冇難度嘅，一於當帕爾馬係火腿咁食啦！