紅魔傷殘「城」籮 好難贏波

猪拉多纳

31/01/2012
文： 力奇

力求衞冕英超嘅曼聯今晚喺奧脫福主場迎戰史篤城，咪以為佢哋主場巴閉同實力秤先，就實食冇黐牙，查實紅魔近排表現反覆，加上兵源緊絀，嚟緊又惡戰連場，領隊費Sir派人或會有所保留，要做低出名硬淨嘅史篤城肯定唔易。紅魔讓波，我建議大家冷敲4倍「讓球客勝」！（有線200、300及廣東體育周三凌晨4:00直播）

曼聯硬仗連場或留力

紅魔今季喺英超一直畀宿敵曼城帶住走，目前踢咗22周落後「藍月亮」3分，嚟緊自然不容有失。力奇唔懷疑費Sir求勝嘅決心，但就擔心佢自視過高，唔會派最強陣容出戰。事實上，紅魔近排一直受傷兵問題困擾，就算話湯卡華利、路爾斯安達臣同艾舒利楊格都就嚟可以復操，但現階段佢哋條中場線的確冇乜兵源調動。

史篤城近10戰僅2敗

要知道踢完今仗，曼聯下輪聯賽就係鬥車路士，之後仲有歐霸盃要踢。相比起嚟，對史篤城表面似係較易執，費Sir或會派部分副選出戰，諸如貝碧托夫同查維亞靴南迪斯等，佢哋都雪到凍晒，落到場未必有貨交。至於後場又話有里奧費迪南傷愈復出，咪話力奇係曼聯Fans都要潑冷水，里奧今季明顯活力大減，有佢落場防線更加危危乎添！


史篤城呢邊，家陣英超排第8，歐霸盃又話入到32強，表現絕對抵讚。呢支專踢高Q大棍嘅球隊，勝在打法直接兼防守硬淨唔易砌，近10戰只係輸過2場波，狀態唔差。仲有，曼聯上月底就試過喺奧脫福輸畀布力般流浪，今次我唔貪心，博史篤城搶到1分已經有錢收。

橫數千軍

 紅魔主場勝率得6成


‧歷來英超3次主場鬥史篤城全部獲勝。

‧今季英超主場戰績僅列第3，勝率僅61%。

 史篤城作客4場不敗

‧近10場英超取得5勝3和2負，不敗率8成。

‧連續4場客戰不敗，近2戰更未有失波。