祖記乘勇帕住上 變陣出擊仲醒神

猪拉多纳

31/01/2012
文： 巨高

本周中意甲開快車，率先上場係帕爾馬主場對祖雲達斯。季初帕爾馬曾經跌到落降班區域，幸經過一輪努力已上返中游位置，但佢哋並冇食住個勢繼續搶分，自去年十二月至今只贏過一場咁大把。帕爾馬冇咗團火，有主場都好難威脅到「一哥」祖雲達斯。兩隊強弱分明，客W值得捧場。（now 633及660周三凌晨3時45分直播）


祖雲達斯周日改打三後衞陣式，表現令人極之滿意，其實以「斑馬兵團」充裕嘅中前場人腳，打少個後衞仲好，起碼有更多球員囤積於中前場，對於中場截擊力一般嘅帕爾馬就極之不利。另外要提一提前鋒馬特尼，呢個意大利國腳弗到你唔信，剛賽對烏甸尼斯就包辦球隊兩個入球，既然已重拾射門觸覺，唔使擔心球隊攻力。要留意祖雲達斯前鋒位置競爭激烈，馬特尼如要保住正選，今場有必要繼續交出「士哥」，此種良性競爭對祖雲達斯百利而無一害。

帕爾馬冇爆冷本錢

帕爾馬球員質素唔高，踢來踢去都係靠基奧雲高一個，但衰在「小螞蟻」身形輸蝕，經常畀對手撞散以至失控球權。尤其「斑馬兵團」一對防守中場馬治斯奧及維達爾相當硬淨，基奧雲高好難有發揮空間。再講，基奧雲高與祖雲達斯關係密切，今場倒戈戰意成疑。